നിയമം

അന്ന്‌:

അന്ന്‌ മനു ചൊല്ലി :
"ഇവളെ പൂജിക്കുകിൽ
രമിക്കും ദേവകളവിടെ
ഇവളെ പരിത്യജിക്കുകിൽ
വസിക്കും ചേട്ടകളവിടെ"
ബുധനാം മാനവനന്നതേറ്റു ചൊല്ലി
മനുവിന്റെ നിയമം ഭരിച്ചു,
വിണ്ണിൽ ദൈവം രമിച്ചു

ഇന്ന്‌:

ബുധത്വം ചമഞ്ഞവർ
പാമരർ, പിശാചുക്കൾ
മനുവിന്റെ നിയമത്തെ
തെരുവിൽ അഗ്നിക്കിരയാക്കി,
ശ്രീഭഗവതിയെ പടിയടച്ചു പുറത്താക്കി,
ചേട്ടയെ കുടിയിരുത്തി,
പെണ്ണിനെ വിലപേശി വിറ്റു
മനുവിന്റെ നിയമം മരിച്ചു. !!

സാത്താന്റെ സന്തതികൾ

'പുരുഷവർഗ്ഗത്തിന്‌
ആവോളം ഭോഗിക്കുവാൻ
ഈശ്വരൻ
സ്ത്രീയെ സൃഷ്ടിച്ചെന്ന്‌' : ഒരു വിടൻ,
പുത്രീതുല്യയെ
സ്വകാമത്തീയിൽ
ചുട്ടെരിച്ച്‌, വലിച്ചെറിഞ്ഞ്‌,
മാന്യത ചമഞ്ഞു
നടപ്പൂ ഒരു കാമഭ്രാന്തൻ.
പരാതിക്കാരിയെ
പൊതുനിരത്തിൽ കല്ലെറിഞ്ഞ്‌,
ലക്ഷങ്ങൾ ലോക്കറിലാക്കി,
'വേശ്യ്‌'യെന്നാക്ഷേപിച്ച്‌
നീതിപീഠത്തിൽ ഞെളിഞ്ഞിരിപ്പൂ
മറ്റൊരു നരാധമൻ.
കലികാലം !
കൽക്കീ, നിന്നുടവാളെനിക്കു നൽകൂ,
കൊത്തിയരിയട്ടെ ഞാനീ
സാത്താന്റെ സന്തതികളെ.

വിപരീത ലിംഗം

"പിഴച്ചവൾ".....?
"പതിവ്രത".......?

വിപരീത ലിംഗങ്ങളില്ലാത്ത
നിത്യ സ്ത്രീലിംഗങ്ങൾ  !!

വില

കുഞ്ഞുപെങ്ങൾക്ക്‌... രണ്ട്‌,
ചേച്ചിക്ക്‌...ഒന്നര,
അമ്മയ്ക്ക്‌......?

റൊക്കം നൽകുന്നവന്‌
അമ്മ ഫ്രീ...... !!

ലക്ഷങ്ങൾ കൈയിൽ വന്നാൽ
കല്ല്യാണം.....
ഒരു പെൺകുഞ്ഞ്‌ ജനിക്കാൻ
ദൈവങ്ങൾക്ക്‌
കൈക്കൂലി .....

അവൾക്കും കിട്ടും ലക്ഷങ്ങൾ....
കൂട്ടിയാലും, കിഴിച്ചാലും
പെണ്ണിന്റെ വില,
ലാഭത്തിൽത്തന്നെ...