2013, മാർച്ച് 24, ഞായറാഴ്‌ച

വാർദ്ധക്യം





"അമ്മേ" !
ആ വിളി കേട്ട്‌ അടുക്കളയിൽനിന്നും ഒരു സ്ത്രീ പുറത്തേക്ക്‌ വന്നു.  കറുത്തു മെലിഞ്ഞ്‌ ഏതാണ്ട്‌ എഴുപത്‌ വയസ്സോളം വരുന്ന ഒരു സ്ത്രീ.
"അമ്മയെ വിളിച്ചോ മോനേ ?"
ആ സ്ത്രീ ദീനസ്വരത്തിൽ ചോദിച്ചു.
"വിളിച്ചു"
അയാളുടെ സ്വരം പരുഷമായിരുന്നു.
"അമ്മ ഒരു സ്ഥലം വരെ എന്റെകൂടെ വരണം. അമ്മയുടെ സാധനങ്ങളെല്ലാം എടുത്തോളൂ".
എവിടേക്കാ എന്നൊരു ചോദ്യം അവർ ചോദിച്ചില്ല.
അയാൾ അവരുടെ വസ്ത്രങ്ങൾ പായ്ക്ക്‌ ചെയ്ത്‌ കാറിൽ കയറി. അപ്പോഴേക്കും അമ്മയും വന്നു .
അമ്മ വലിയ വിദ്യാഭ്യാസം നേടിയസ്ത്രീയല്ല. മകന്റെയും മകളുടെയും ഫ്രൻഡ്‌സൊക്കെ വീട്ടിൽ വരുന്നതാണ്‌. അമ്മയ്ക്ക്‌ അവരോട്‌ പെരുമാറാനറിയില്ലെന്ന്‌ പലപ്പോഴും മക്കൾ പരാതിപ്പെട്ടതായി അയാൾ ഓർത്തു. മക്കൾക്കുമാത്രമല്ല, ഭാര്യയ്ക്കും തന്റെ അമ്മയെപ്പറ്റി പരാതികൾ ഈയിടെയായി കൂടുതലാണ്‌. തനിക്കെന്തു ചെയ്യാനൊക്കും ?
ഒടുവിൽ സുഹൃത്തുക്കളാണ്‌ ഈ വഴി പറഞ്ഞുതന്നത്‌. ഇന്നത്തെക്കാലത്ത്‌ ഇതൊന്നും അത്ര വലിയ കുറ്റമല്ല.
വണ്ടി ഒരു വലിയ ബിൽഡിംഗിനു മുന്നിൽ നിർത്തി. അയാൾ ഇറങ്ങി. ഒപ്പം അമ്മയേയും ഇറക്കി. അമ്മ ചുറ്റുപാടും കൗതുകത്തോടെ കണ്ണോടിച്ചു. തന്നെപ്പോലെ എത്രയോപേർ.
അയാൾ അമ്മയേയുംകൂട്ടി ആ വലിയ ബിൽഡിംഗിലെ ഒരു റൂമിലേക്ക്‌ ചെന്നു. അവിടെയിരിക്കുന്ന ആളോട്‌` എന്തൊക്കെയോ പറഞ്ഞ്‌ അമ്മയേയുംകൂട്ടി മറ്റൊരു റൂമിലേക്ക്‌ പോയി.
"അമ്മേ ! അമ്മയിനി ഇവിടെയാണ്‌ താമസിക്കാൻ പോകുന്നത്‌. വിരോധമൊന്നുമില്ലല്ലോ ? ഇവിടെ അമ്മയോട്‌ കൂട്ടുകൂടാൻ ഒരുപാട്‌ പേർ കാണും."
അയാൾ തിരിഞ്ഞു നടന്നു.
അമ്മ കരയാൻപോലുമാകാതെ തരിച്ചു നിന്നു.
അയാൾ കാറിൽ കയറി. കാർ സ്റ്റാർട്ട്‌ ചെയ്തു.
ഗെയ്റ്റ്‌മേൻ ഗെയ്റ്റ്‌ തുറന്നുകൊടുത്തു.
അപ്പോൾ ഗെയ്റ്റ്‌മേൻ ഇങ്ങനെ പിറുപിറുക്കുന്നുണ്ടായിരുന്നു.
"നീയും വരും ഇവിടെ.......     നിനക്കും വാർദ്ധക്യമുണ്ടല്ലോ... !"


2013, മാർച്ച് 18, തിങ്കളാഴ്‌ച

അവനും അവളും




പ്രാണനാഥൻ
അന്ധനെന്നുകണ്ട്‌
സ്വസുഖം ത്യജിച്ച്‌,
അന്ധതയെ സ്വയം വരിച്ച്‌
അവൾ "പതിവ്രത"യായി....
പാതിവ്രത്യം അവളുടെ ധർമ്മമത്രെ........!!?
വിധിക്കപ്പെട്ട ധർമ്മങ്ങളിൽ
"പത്നീവ്രതം" ഇല്ലാത്തതിനാലാകണം
ബഹുഭാര്യാത്വം അവന്റെ
വിനോദമായി തീർന്നത്‌...


2013, മാർച്ച് 13, ബുധനാഴ്‌ച

വാക്ക്‌




അമ്മയിലൂടെ ഞാൻ 

ആദ്യം കേട്ട വാക്ക്‌ : 'അച്ഛൻ'
ആദ്യം ഞാൻ ഉച്ചരിച്ച വാക്ക്‌ :  'അമ്മ'
ബാല്ല്യത്തെ ചിരിപ്പിച്ച വാക്ക്‌  :  'കൂട്ടുകാരി'
അകക്കണ്ണിൻ വാതിലുകൾ 
തുറപ്പിച്ച വാക്ക്‌  :  'വിദ്യ'
യൗവ്വനത്തെ ത്രസിപ്പിച്ച വാക്ക്‌  :  'പ്രണയം'
ജീവിതത്തെ സാന്ത്വനിപ്പിച്ച  വാക്ക്‌  :  'ഭാര്യ'
വാർദ്ധക്യത്തെ  കരയിപ്പിച്ച വാക്ക്‌ :  'മക്കൾ'

2013, മാർച്ച് 9, ശനിയാഴ്‌ച

ഭിക്ഷ




വഴിയരികിലെ ഭിക്ഷക്കാരന്‌
അഞ്ചുരൂപ 'ഭിക്ഷ'
വഴിക്കണ്ണ്‌ നട്ടിരിക്കുന്ന മക്കൾക്ക്‌
പലഹാരപ്പൊതി 'ഭിക്ഷ'
മുഖം കറുപ്പിക്കുന്ന ഭാര്യയ്ക്ക്‌
പട്ടുസാരി 'ഭിക്ഷ'
പരാതികളില്ലാത്ത,
അടുക്കളക്കോലായിലെ
മെലിഞ്ഞ രൂപത്തിന്‌ - അമ്മയ്ക്ക്‌
ഈ  ജീവിതം 'ഭിക്ഷ'  ! ?






2013, മാർച്ച് 2, ശനിയാഴ്‌ച

ചിലന്തി




ഉമ്മറക്കോലായിൽ
ഒരു ചിലന്തി നെയ്ത
സുവർണ്ണനൂലുകളുള്ള വലയിൽ
ഒരു പ്രാണി
ജീവനുവേണ്ടി പിടയുന്നു
അകത്ത്‌,
ഫാനിലെ
സാരിത്തുമ്പിൽ
ഒരേ ഒരു മകളും !